نظرة ميتة                        قصة قصيرة

ككل صباح استيقظ عم عيد مع آذان الفجر الذى يحرص على أن يصليه قبل ان يتناول افطاره ثم يوقظ ابنه الصغير سعيد كى يستعد للذهاب لمدرسته الثانويه البعيدة لحد كبير عن سكنه البعيد عن العمران .

ثم ينتظر حتى الثامنة صباحا ويذهب مع ابنه الكبير سعد خريج كليه الاداب لارضه .

تعود عم عيد على هذه الحياة التى استمرت أكثر من ثمانيه عشر سنه .

ولا يدرى أحد على وجه اليقين كيف ولماذا أستقر عم عيد فى الحياة بين محافظتى البحيرة والإسكندرية .

تلك الارض الخضراء المعدومة الحياة التى نراها اثناء سفرنا بالقطار بين المحافظات .

ولكنه دائما ما يردد انها ارض ميراثه من اجداده ولن يتركها .

ورغم صعوبه الحياة نسبيا فى تلك المناطق الا انه كان عنيد لحد كبير .. اصر على تعليم ابنائه وعندما التحق ابنه الكبير سعد بكليه اداب الإسكندريه كان يحلم ان يعمل بعدها سعد فى وظيفه محترمة فى مدينة الإسكندريه الأكثر إمكانيه للعمل بها عن محافظة البحيرة . على ان يظل فى نفس السكن ووعده عندما يتزوج ببناء سكن خاص له على أرضهم .

وتحققت امانى عم عيد فى ابنه عدا موضوع الوظيفه المحترمة بالإسكندرية .

ولكن لم ييأس عم عيد بعد تكرار التعثر فى الحصول على الوظيفه وكل مرة يعود سعد بخيبة أمل لإبيه .

حتى قال له ابوه مرة : خلاص ولا يهمك ولا تقدم على وظيفه احسن لك ماتشتغلش عند حد وادى الارض ملكك وملك اخوك من بعدى تعالى معايا وايدك بإيدى وربنا حايرزقنا ان شاء الله .

ولم يكن لسعد الا الإستماع لنصيح والده وفعلا تعلم منه واصبح ذراع والده المسن وتزوج وانجب ولدا فى عامه الاول .

نظر عم عيد لارضه بما تحويه من زراعات متنوعه وقال لإبنه : عارف يا سعد الأرض دى التلات فدادين دول ما إتزرعوش بالساهل . ولا حتى زى اى فلاح عادى .

انا لو مت حاسيبلك الارض وحا أسيبلك فوقها مشاكلها اللى يمكن تهزمك لكن لازم تكون عنيد زيى وماتستسلمش انت ابن عيد .

رد سعد وهو ينظر لوالده نظرة حانيه : عارف يا بابا طبعا غرابه وضع ارضنا اللى بين المحافظتين وكل محافظة تطلع روحنا وترمينا للمحافظه التانيه وتقولنا انتم مش تبعى , لاء مافيش ورق رسمى للحدود بين المحافظتين , مالكمش لا سماد ولا تقاوى عندنا .

عارف اد ايه انت لفيت على المسؤلين عن الزراعة هنا وهنا وياما إتحايلت عليهم علشان يدونا اللى يخلى الارض دى تعيش . ربنا يخليك لنا ده انت مافيش زيك .

رد عم عيد وهو ينظر لأبعد نقطة من ارضه إستطاعت ان تصل لها عيناه وقال : طول السنين دى وهمه بيقولوا خلاص حاتفرج اول ما مجلس المحافظين حايرسموا حدود محافظاتهم

وسنه تجر سنه … ولولا انى صعبت على الاستاذ صلاح مصطفى اللى قالى ماشى ياعم عيد استنانى حاأكلم نبيل بيه المدير المسؤل يستثناك ويضمك معانا وراح ورجع وقاللى ابسط ياعم علشان خاطرى وافق و حانعتبر ارضك ضمن اراضى محافظة الإسكندرية وحانديلك السماد من عندنا لكان زمان الارض دى صفرا . ولو انى خايف من يوم طلوعه على المعاش اللى قرب حا أتبهدل من بعده يابنى .

ولو اننا لحد النهاردة برضه بنتبهدل . ساعات بتكون للأرض طلبات وضروريات لازمه لها وده خارج اختصاص الاستاذ صلاح . ومايقدرش يساعدنى فيها . الاقى نفسى يوم فى البحيرة ويوم فى اسكندريه .

وبطلوع الروح حد يعبرنى ويقولى بس علشان خاطرك وسنك لكن مش كل مرة ….

تعبت يا بنى والله . لكن كله يهون لما تلاقى زرعك طالع منور ومحصولك بسم الله ماشاء الله كتير .

رد سعد على والده : شىء غريب جدا ازاى للنهارده ومش عارفين يرسموا خطوط تفصل المحافظات عن بعض ؟؟؟علشان كل محافظة تعرف حدودها ؟

ولا علشان الناس الموجودين فى المناطق دى مالهمش قيمة عند الحكومة ولا يهمومها فى حاجه .

وكل الموجود هنا مجهود ناس عايشين زينا فى المنطقه دى . سواقين الميكروباسات وعم نجيب بتاع السوبر ماركت وشويه محلات الهدوم وانت يا ابويا اللى بنيت الجامع .

يعنى لا بيقدموا لنا خدمات ولا حتى بيسهلوا لنا ندبر امورنا .

تنهد عم عيد وقال : هه مافيش فايدة يالله بينا نشوف اللى ورانا ….

تمر الأيام على عم عيد واسرته بنفس الوتيرة . لاجديد يطرأ عليها الا نادرا .

وكان هذا الجديد بعد طرح المحصول وجنيه وبيعه بمبلغ أرضى عم عيد كثيرا .

استعد لموسم الزراعة الجديد وبدأ يبذر البذور ثم جاء ميعاد الذهاب للأستاذ صلاح مصطفى كى يمده بالسماد والتقاوى كما اعتاد لهذه البذور ..

قال لسعد قبل ان يستسلم للنوم : سعد خليك انت بكرة فى الأرض وانا اللى حاروح إسكندرية انا عارف انك عايز تريحنى وتروح انت لكن معلش انا إتعودت على المشوار ده .

رد سعد : اللى تشوفه اللى يريحك يابابا .

إستيقظ عم عيد كعادته فى الفجر الذى صّلاة ثم تناول إفطاره ونزل ليركب الميكروباس من موقفه الذى يمشى كى يركبه عشر دقائق تقريبا ودعى الله فى سره ان يجد له مكان فيه .

وصل فى الوقت المناسب وكان آخر راكب فى الميكروباس الذى كان يستعد للقيام

حمد الله . وسرح فى تصور سيناريو ما سيقابله فى الساعات القادمة .

كان يخشى ان يكون الاستاذ صلاح قد احيل للمعاش .. او يكون فى أجازة …

ولكنه لم يبلغ بتفكيره ابدا لما سيكون .

وصل لمديريه الزراعه بعد حوالى ساعتين ونصف . ودخلها وهو يقرأ الفاتحة فى سره .

ووجد الأستاذ صلاح فى مكتبه . حمد الله كثيرا وتقدم منه مبتسما : صباح الخير يا استاذ صلاح النهاردة ميعاد السماد والتقاوى كل سنه وانت طيب .

رد الأستاذ صلاح : ازيك يا عم عيد ..ياراجل هو انت ماعندكش خبر ؟

رد عم عيد بقلق : خير يا استاذ صلاح ؟

أجابه الأستاذ صلاح : كل سنه وانت طيب خلاص ياسيدى الحمد لله أخيرا رسموا الحدود بين المحافظات من اسبوع استنانى اشوف ارضك بقيت ايه ؟

نظر الأستاذ صلاح على خريطة امامه مرسوم عليها برسومات كبيرة محافظتى البحيرة والإسكندرية .

ودقق النظر فيها بينما كان قلب عم عيد يدق بطريقه جعلته لايقوى على الوقوف واشار بيده على مقعد امامه فأشار له الأستاذ صلاح بالجلوس .

وبعد دقائق هى ساعات مرت على عم عيد .. رفع الأستاذ صلاح عينيه من الخريطة وقال : ايوة ياعم عيد انت ارضك التلات افدنة اصبحت الآتى : فدانين وربع تبع البحيرة ,,, وال75% الباقى تبعنا هنا فى إسكندرية …

نظر عم عيد لوجه الاستاذ صلاح مليا ثم نطق قائلا: يعنى ايه معناه ايه الكلام ده يا استاذ صلاح ؟؟؟

رد الأستاذ صلاح : معناه اننا من النهاردة مش حانقدر نمدك الا بسماد وتقاوى ال75% من قيمه فدان واحد وعليك انك تستلم حصتك الفدانين وربع من البحيرة ..

واهه امضى بإستلام نصيبك الجديد ..

رد عم عيد : ايوة بس يعنى انا اعمل ايه دلوقتى البذور إتحطت ولازم تتسمد والا مش حاتنفع تتزرع .

رد الاستاذ صلاح : ما انا بقولك اهه روح حالا البحيرة وانت تصرف من عندهم مافيش مشكلة …

فكر عم عيد وحسبها فى عقله فقال له : معاك حق فين الورق امضى عليه واستلم نصيبى منكم .

انهى الإجراءات واخد حصه ال75 % من الفدان ثم اسرع باللحاق بأتوبيس ينقله لمديريه زراعه البحيرة .

وللمرة الثانية وقف امام الموظف المسؤل هناك وقال له : يا استاذ انا جاى استلم نصيبى من السماد والتقاوى لارضى اللى بقى اتنين وربع منها تبعكم .

نظر له الموظف ببرود شديد وقال له : ارض ايه ؟؟

رد عليه عم عيد : الارض الزراعيه التلات افدنة بين البحيرة واسكندريه .

قاطعه الموظف وكما كان مكتوب ان اسمه فريد وقال : ايوة هو انت بقى صاحب الارض اللى بلونا بيها فى التقسيم الجديد ؟؟؟

ابتلع عم عيد تلك الاهانة بصعوبة ولكنه رد بهدوء تعود عليه خلال رحله تعامله مع موظفين الحكومة وقال :

ايوة يا أستاذ انا وده الورق الرسمى اللى يثبت ملكيتى للأرض دى .

قال فريد : بس بس ماتورنيش حاجه مصدقك ياسيدى لكن انت مش حاتستلم حاجه من السماد والتقاوى الا بعد تسع عشر شهور .. وقول يارب ومايزيدوش …

 رد عم عيد بصوت ارتفع رغم ارادته عند سماعه هذا الكلام قائلا : ازاى الكلام ده ؟؟ تسع عشر شهور ايه ده كده البذور تموت وماتصلحش للزراعه الارض بعد كده هو انتم ماتعرفوش نوعيه الارض فى المنطقه دى عامله ازاى ؟ دى مش زى بقيه الاراضى .

رد فريد : ماتعليش صوتك انا مش جايب الكلام ده من دماغى . مش بتعرف تقرأ !! أهه أقرا .

ونظر عم عيد لورقه من ملامحها تدل على صدورها من جهه رسميه . وكان مكتوب فيها انه تقرر القيام بأعمال إدارية ملازمة لصدور قرار تقسيم المحافظتين ودراسة الجديد الذى اصبح لكل محافظة واحتياجتها والعمل على إيجادها خلال فترة تمتد لعشر شهور ثم بعدها تقوم المديريه بعملها لخدمة المواطنين !!!

وخلال تلك الفترة ستضطر اسفة توقيف خدماتها للجمهور . ولكنها تعدهم عند إستئناف عملها ان تقدم لهم الخدمات بطريقه ستنال رضاهم !!!!!!!!! .

لم ينطق عم عيد بكلمة .. أخذ الورقه واندفع خارجا بقوة لايحتمله عمره الكبير وتوجه لغرفه مدير المديريه التى كان يعرف مكانها من زيارات سابقه .

لم يطرق الباب بل دفعه بشدة واندفع وراه داخل الحجرة ..

كان المدير معه بعض الموظفين . نظر له المدير وقال بصوت عال : ايه ده ؟ ايه قله الذوق دى ازاى تدخل كده ؟؟؟

كانت السكرتيرة تنبهت ودخلت ورائه حجرة المدير تنفى عن نفسها الاهمال وتقول لمديرها يافندم ده اتهجم على الاوضة ومعرفتش اوقفه ..

وعندما كان المدير سيتكلم . لم يترك له عم عيد فرصه النطق بحرف واحد بل قال بصوت مرتفع : ايه القرار ده وازاى طلع ؟؟ معناه ايه اسيب ارضى تموت زرعى محصولى يموتوا ازاى ازاى ؟؟؟

جاء فريد الموظف على كل هذا الصياح وقال موجها كلامه للمدير: يافندم الرجل ده باين عليه اتجنن انا قريته القرار . اهه يافندم .

وتقدم فريد من مديره واشار له على الفقرة الخاصه بموضوع عم عيد .. قرأها ..

ثم نظر لعم عيد نظرة ضيق شديد وقال : طب ما انت قريت اهه عايز ايه بقى ؟؟ مش احنا اللى طلعنا القرار ده روح لهم هناك فى القاهرة احنا مالناش دعوة ..

قال عم عيد بصوت غلبه فيه دموعه : يابيه كده الارض حاتموت ماتستحملش تعد المدة الكبيرة اوى دى من غير سماد وتقاوى حرام عليكم هو اللى طلع القرار ده مش عارف كده ؟؟؟

رد المدير بصوت سمعه كل من كان فى المديريه : بقولك ايه ماتوجعش دماغنا . شيلوه طلعوه بره … ارموه .بره ……

وفعلا امتدت اياد كثيرة حملت عم عيد ورمت به على سلالم المديرية بلا رحمة ..

عندما استطاع الوقوف . كانت هناك بعض قطرات من دمائه قد التصقت بجلابيته .

إنتابته حالة من الجمود وكأن لا أثر للحياة فيه .

قادته قدماه بحكم التعود لموقف الاتوبيس وركبه .

ولو كان احد يعرفه ونظر له فى هذه اللحظة لوجده ينظر لبعيد وكأنه يرى امرا غير مرئى ..

وصل لأرضه … ولكنه لم يتوجه لها مباشرتا . ذهب اولا لمحل واشترى منه شيئا حمله كما يحمل الكفن .

ثم اتجه لارضه .. نظر لها نظرة اخيرة .. بنفس العينين الجامدتين .

ثم فتح الزجاجة الكبيرة وبدأ يسكبها على ارضه ..

فاحت رائحه البنزين بطريقه قويه جدا ..

تملكته قوة شديدة جعلته يجيب ارضه كلها كى ينشر البنزين فيها

ثم اخرج عود ثقاب واشعله ورماه بدون تردد على الارض ..

وسرعان ما إشتعلت حريق هائلا وتصاعدت النيران لاعلى ..

وجاء كل من كان متواجدا فى هذه اللحظة واولهم ابنه سعد وقد تملكه الذهول وصاح : ليه يابابا انت بتعمل كده ليه رد عليا يا بابا …

ولكن عم عيد لم ينطق بكلمة واحدة ..

نظر ابنه سعد إليه فوجد عينان ابوة تنظران إليه بنظرة لم يراها فى عيني والده من قبل ..

نظرة متحجرة متبلدة ساكتة …

كانت نظرة ميتة ….

                       إنتهت .

              نيفين عمر .

 

ـــــــــــــــــــــــــــــــــــــــــــــــــــــــــ
التصنيفات : القصص | السمات:القصص
أرسل الإدراج  |   دوّن الإدراج